ក្រុមអ្នកសារព័ត៌មាន18 ស្ថាប័ន និងប្រតិភូក្រសួងបរិស្ថាន ចុះពិនិត្យនិងស្វែងយល់ការងារគ្រប់គ្រងដែនជម្រកសត្វព្រៃកែវសីមា ខេត្តមណ្ឌលគិរី
ភ្នំពេញ ៖ ក្រុមអ្នកសារព័ត៌មានក្នុងស្រុក18ស្ថាប័នដឹកនាំឯកឧត្តម នេត្រ ភក្ត្រា អ្នកនាំពាក្យក្រសួង បរិស្ថាន ចុះពិនិត្យនិងស្វែងយល់ការងាររៀបចំគម្រោងរេដបូកនិងការគ្រប់គ្រងដែនជម្រកសត្វព្រៃកែវសីមាស្ថិតក្នុងភូមិសាស្ត្រខេត្តមណ្ឌលគិរី ពីថ្ងៃទី ៣ ដល់ ថ្ងៃទី៥ ខែតុលា ឆ្នាំ ២០២០ ។
គោលបំណងនៃដំណើរទស្សនកិច្ចចុះពិនិត្យនិងស្វែងយល់នេះគឺដើម្បីផ្តល់ឱកាសជូនគណៈប្រតិភូ និង ក្រុមអ្នកសារព័ត៌មានដើម្បីបានស្វែងយល់និងជួយលើកកម្ពស់ការយល់ដឹងសាធារណៈអំពី ការរៀប ចំនិងការអនុវត្តគម្រោងកែវសីមា រេដបូក, ការការពារនិងអភិរក្សធនធានជីវៈចម្រុះ និងកម្មវិធី លើកកម្ពស់ជីវភាពរស់នៅរបស់ប្រជាសហគមន៍មូលដ្ឋាន។
ក្នុងកំឡុងដំណើរទស្សនកិច្ចនេះ គណៈប្រតិភូនឹងអញ្ជើញជួបជាមួយតំណាងមន្ទីរបរិស្ថានខេត្តមណ្ឌលគិរី នាយកដែនជម្រកសត្វព្រៃកែវសីមា មន្ត្រីឧទ្យានុរក្ស និងតំណាងអង្គការ WCS នៅឯស្នាក់ការដែនជម្រកសត្វព្រៃកែវសីមា ដើម្បីពិភាក្សាអំពីការអនុវត្តគម្រោងរេដបូក និងយន្តការពាក់ព័ន្ធនឹងការបែងចែកផលប្រយោជន៍ដល់់សហគមន៍។
បន្ទាប់មក គណៈប្រតិភូនឹងបន្តដំណើរទៅកាន់សហគមន៍តំបន់ការពារធម្មជាតិស្រែព្រះស្ថិតក្នុងឃុំស្រែព្រះ ស្រុកកែវសីមា ជំរំសត្វទោចថ្ពាល់លឿងស្ថិតក្នុងភូមិអណ្តូងក្រឡឹងនិងរមណីយដ្ឋានទឹកធ្លាក់«លែងអង»និង«លែងឃិន»ស្ថិតក្នុងស្រុកអូររាំង ដើម្បីជួបសំណេះសំណាលជាមួយសហគ្រាសសហគមន៍កែច្នៃឫស្សីរបស់សហគមន៍តំបន់ការពារធម្មជាតិស្រែព្រះ ក្រុមកសិករផលិតស្រូវមិត្តភាពសង្គ្រោះសត្វព្រៃ (អាប៊ីស រ៉ាយស៍) ក្រុមសហគមន៍ទេសចរណ៍ធម្មជាតិ និងពិនិត្យមើលសមិទ្ធិផលមួយចំនួនដែលសហគមន៍អនុវត្តនិងសម្រេចបានក្រោមគម្រោងរេដបូក ដូចជា ប្រព័ន្ធផ្គត់ផ្គង់ទឹកស្អាតថ្នាក់ភូមិ រោងប្រជុំសហគមន៍ អណ្តូងស្នប់ និងស្ពានឆ្លងកាត់ភូមិ។
លោកស្រី Veena Reddy នាយកបេសកកម្មទីភ្នាក់ងារជំនួយអាមេរិក (USAID) ប្រចាំកម្ពុជា បានកត់សម្គាល់ថា «ការអនុវត្តគម្រោងរេដបូកប្រកបដោយជោគជ័យនឹងផ្តល់អត្ថប្រយោជន៍រួមដល់សហគមន៍ ធម្មជាតិ និងសេដ្ឋកិច្ច។ គម្រោងនេះអាចជួយការពារនិងអភិរក្សប្រភេទសត្វសំខាន់ៗដែលជិតផុតពូជ ធនធានជីវៈចម្រុះ និងគម្របព្រៃឈើ។ វាក៏អាចជួយអភិរក្សវប្បធម៌នៅក្នុងតំបន់ផងដែរ។»
ឯកឧត្តម នេត្រ ភក្ត្រា អ្នកនាំពាក្យក្រសួងបរិស្ថាន បានអោយដឹងថា «ក្នុងនាមក្រសួងបរិស្ថាន ខ្ញុំសូមថ្លែងអំណរគុណចំពោះអង្គការដៃគូពាក់ព័ន្ធទាំងអស់ ជាពិសេស ទីភ្នាក់ងារជំនួយអាមេរិក USAID ដែលបានបន្តចូលរួមចំណែកការពារនិងអភិរក្សព្រៃឈើរបស់ព្រះរាជាណាចក្រកម្ពុជាឱ្យនៅគង់វង្ស ឈានដល់មានការលក់ឥណទានកាបូននៅក្នុងដែនជម្រកសត្វព្រៃកែវសីមា។
ការរួមចំណែករបស់ដៃគូទាំងអស់មិនត្រឹមតែបានផ្តល់អត្ថប្រយោជន៍ដល់ប្រព័ន្ធអេកូឡូស៊ីប៉ុណ្ណោះទេ ប៉ុន្តែថែមទាំងផ្តល់អត្ថប្រយោជន៍ដល់សហគមន៍មូលដ្ឋានផងដែរតាមរយៈការបង្កើតតំបន់ទេសចរណ៍ធម្មជាតិ។
ក្រសួងបរិស្ថាន និងដៃគូទាំងអស់ ហើយក៏សូមថ្លែងអំណរគុណដល់មន្ត្រីឧទ្យានុរក្សរបស់យើងទាំងអស់ អាជ្ញាធរមូលដ្ឋានគ្រប់លំដាប់ថ្នាក់ និងមន្ទីរបរិស្ថានខេត្តមណ្ឌលគិរីចំពោះការប្តេជ្ញាចិត្តខ្ពស់របស់ខ្លួនក្នុងការអភិរក្សធនធានជីវៈចម្រុះនិងសត្វព្រៃនៅកម្ពុជាសម្រាប់មនុស្សជំនាន់ក្រោយរបស់យើង។»
នាយកអង្គការ WCS ប្រចាំនៅកម្ពុជា លោក កែន សេរីរដ្ឋា
មានប្រសាសន៍ថា “ដោយមានការគាំទ្រជា បន្តបន្ទាប់ពីម្ចាស់ជំនួយរបស់យើង អង្គការWCSសម្រេចបានសមិទ្ធិផលការងារអភិរក្សយ៉ាងច្រើនគួរឱ្យ កត់សម្គាល់ក្នុងរយៈពេលប៉ុន្មានឆ្នាំថ្មីៗនេះ។
យើងមានមោទនភាពចំពោះកិច្ចខិតខំប្រឹងប្រែងទាំងនេះ ហើយយើងសូមថ្លែងអំណរគុណចំពោះការគាំទ្ររបស់ក្រសួងបរិស្ថាន មន្ទីរបរិស្ថានខេត្ត និងអាជ្ញាធរមូលដ្ឋាន ដែលធ្វើឱ្យយើងទាំងអស់គញនាអាចសំរេចបាននូវគោលដៅរួមរយៈពេលវែងរបស់យើងក្នុងការងារអភិរក្សនិងអភិវឌ្ឍន៍សហគមន៍៕
