មន្ទីររ៉ែ និងថាមពលខេត្តកោះកុង ស្នើឲ្យពលរដ្ឋត្រៀមម៉ាស៊ីនភ្លើងទុកប្រើប្រាស់
មន្ទីររ៉ែ និងថាមពលខេត្តកោះកុងបានស្នើឲ្យម្ចាស់ផ្ទះសំណាក់ សណ្ឋាគារ សហគ្រាស និងប្រជាពលរដ្ឋ ត្រៀមម៉ាស៊ីនភ្លើងសម្រាប់ប្រើប្រាស់ផ្គត់ផ្គងអគ្គិសនីផ្ទាល់ខ្លួន ដោយថាថាមពលអគ្គិសនីបានពី ទំនប់វារីអគ្គិសនី និងពីប្រទេសថៃមិនគ្រប់គ្រាន់។
កាលពីម្សិលមិញមន្ទីររ៉ែ និងថាមពលខេត្តកោះកុងបានចេញសេចក្ដីជូនដំណឹងមួយ ដោយសរសេរថាអាកាសធាតុក្ដៅរាំងស្ងួត ធ្វើឲ្យទំបន់វារីអគ្គិសនីតាតៃ និងឫស្សីជ្រុំ មានកម្ពស់ទឹងទាប មិនអាចទាញថាមពលអគ្គិសនីគ្រប់គ្រាន់ដើម្បីផ្គត់ផ្គង់ក្នុងខេត្ត ក៏ដូចជាទូទាំងប្រទេស។
ប្រភពដដែលសរសេរថាថាមពលអគ្គិសនីនៅពេលនេះមានត្រឹម១០មេហ្គាវ៉ាត់ ដែលមិនអាចផ្គត់ផ្គង់ អគ្គិសនីនៅក្នុងក្រុងខេមរភូមិន្ទ និងស្រុកមណ្ឌលសីមា បានឡើង ដោយថាតំបន់ខ្លះមានអគ្គិសនី និងតំបន់ខ្លះពុំមានអគ្គិសនីប្រើប្រាស់ ដោយសារក្រុមហ៊ុនអគ្គិសនីធ្វើការផ្គត់ផ្គង់ប្ដូរវេន។
សម្រាប់ថាមពលអគ្គិនសីចំនួន១០មេហ្គាវ៉ាន់នេះមួយផ្នែកបានពីប្រទេសថៃ និងមួយផ្នែកទៀតបានពីទំបន់វារីអគ្គិសនីតាតៃ។ នៅពេលដែលអគ្គិសនីខេត្តកោះកុងបានទិញថាមពលអគ្គិសនីនិងរៀបចំបណ្ដាញបន្ថែមពីប្រទេសថៃរួច នោះការផ្គត់ផ្គង់អគ្គិសនីជូនប្រជាពលរដ្ឋនឹងដំណើរការធម្មតាឡើងវិញ។ ប្រភពដដែលបន្ត។
ប្រភពដដែលសរសេរថា៖ «សំណូមពរដល់ឯកឧត្តម លោកជំទាវ លោក លោកស្រី បងប្អូនប្រជាពលរដ្ឋ ម្ចាស់សណ្ឋាគារ ផ្ទះសំណាក់ សហគ្រាស សូមត្រៀមម៉ាស៊ីនភ្លើងផ្ទាល់ខ្លួន សម្រាប់ប្រើប្រាស់ដោយខ្លួនឯង ចាប់ពីថ្ងៃជូនដំណឹងនេះតទៅ»៕
