ក្រុមហ៊ុន Apple បានលុបចោលគម្រោងរបស់ខ្លួនក្នុងការផលិតរថយន្តអគ្គិសនី
ថ្ងៃទី២៧ ខែកុម្ភៈ ឆ្នាំ២០២៤ ក្រុមហ៊ុន Apple បានលុបចោលគម្រោងរបស់ខ្លួនក្នុងការផលិតរថយន្តអគ្គិសនីបើកបរដោយខ្លួនឯង។ ប្រភពមួយបានប្រាប់សារពត៍មាន Reutersកាលពីថ្ងៃអង្គារ៍ មួយទសវត្ស បន្ទាប់ពីក្រុមហ៊ុនផលិតទូរស័ព្ទ iPhone ក៏បានចាប់ផ្តើមធ្វើការលើគម្រោងដ៏ធំមួយនេះ។
បុគ្គលិកជាច្រើននាក់ដែលធ្វើការលើគម្រោងរថយន្តអគ្គិសនី នឹងត្រូវផ្លាស់ទៅផ្នែក AI របស់ក្រុមហ៊ុនផលិត iPhone។ ក្រុមហ៊ុន Apple មិនបានឆ្លើយតបភ្លាមៗ ចំពោះសំណើរបស់សារព័ត៌មានសម្រាប់ការអត្ថាធិប្បាយលើបញ្ហានេះទេ។
ក្រុមការងាររថយន្តក្រុមហ៊ុន Apple ត្រូវបានរាយការណ៍ថា គឺជាក្រុមគម្រោងពិសេសដែលជាផ្នែកមួយរបស់នាយកប្រតិបត្តិក្រុមហ៊ុន លោក Tim Cook ដែលឈ្មោះថា «Project Titan» ដោយត្រូវបានចំណាយប្រាក់រាប់ពាន់លានដុល្លារលើការស្រាវជ្រាវ និងអភិវឌ្ឍន៍។ ដំបូងឡើយ ក្រុមហ៊ុន Apple ត្រូវបានគេរាយការណ៍ថា កំពុងធ្វើការលើរថយន្តស្វ័យប្រវត្តិពេញលេញដោយគ្មានចង្កូត និងឈ្នាន់ហ្វ្រាំង ហើយនិងឈ្នាន់ហ្គែរ ខណៈដែលក្រុមនេះត្រូវបានគេយល់ថា ត្រូវការពេលច្រើនឆ្នាំទៀតក្នុងការផលិតរថយន្ត។ ក្រុមហ៊ុន Apple បាននិងកំពុងស្វែងរកឱកាសនៃការផលិតផ្សេងទៀតក្រៅពី iPhone និងកុំព្យូទ័រ ដែលរួមទាំងកាសស្តាប់និម្មិត Vision Pro ដែលទើបចេញកាលពីពេលថ្មីៗនេះ។
