គ ជ ប បិទសិក្ខាសាលាស្ដីពី «ការបោះឆ្នោត ការរាប់សន្លឹកឆ្នោត និងការប្រកាសលទ្ធផលនៃការបោះឆ្នោត»

(ភ្នំពេញ)៖ វគ្គបណ្ដុះបណ្ដាលដល់មន្រ្តីបោះឆ្នោត គណបក្សនយោបាយ និងភាគីពាក់ព័ន្ធនឹងការបោះឆ្នោត រយៈពេល ២ថ្ងៃ ស្ដីពី «ការបោះឆ្នោត ការរាប់សន្លឹកឆ្នោត និងការប្រកាសលទ្ធផលនៃការបោះឆ្នោត» សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ បានបិទបញ្ចប់នារសៀលថ្ងៃទី១៦ ខែកុម្ភៈ ឆ្នាំ២០២៤។

ថ្លែងក្នុងពិធីបិទ លោក ទេព នីថា អគ្គលេខាធិការ គ.ជ.ប បានថ្លែងថា ថ្វីត្បិតតែការបោះឆ្នោតជ្រើសតាំងសមាជិកព្រឹទ្ធសភា គឺជាការបោះឆ្នោតអសកល ដែលអ្នកបោះឆ្នោត និងអង្គបោះឆ្នោត គឺជាតំណាងរាស្រ្តក្នុងតំណែង និងសមាជិកក្រុមប្រឹក្សាឃុំ សង្កាត់ទាំងអស់ក្នុងតំណែងក៏ដោយ ក៏ថ្នាក់ដឹកនាំ គ.ជ.ប ជាពិសេសប្រធាន គ.ជ.ប តែងតែគិតគូរយកចិត្តទុកដាក់ខ្ពស់ ដើម្បីធ្វើយ៉ាងណាឱ្យការបោះឆ្នោតនេះប្រព្រឹត្តទៅបានល្អបំផុត និងត្រឹមត្រូវតាមច្បាប់កំណត់។

លោកថា «ការងារនេះអាចសម្រេចទៅបាន គឺអាស្រ័យដោយមន្រ្តីបោះឆ្នោតគ្រប់លំដាប់ថ្នាក់ ព្រមទាំងភាគីពាក់ព័ន្ធទាំងអស់ មានការយល់ដឹងច្បាស់អំពីច្បាប់ បទបញ្ជា និងនីតិវិធីសម្រាប់ការបោះឆ្នោត ដើម្បីត្រៀមអនុវត្ត និងចូលរួមសហការអនុវត្តតាមមុខការរៀងៗខ្លួន។ ហេតុនេះហើយទើប គ.ជ.ប ត្រូវរៀបចំវគ្គបណ្តុះបណ្តាលនៅគ្រប់ដំណាក់កាលទាំងអស់ រួមទាំងវគ្គបណ្តុះបណ្តាលរយៈពេល ២ថ្ងៃនេះ ដើម្បីផ្តល់នូវការយល់ដឹងពាក់ព័ន្ធនឹងកិច្ចប្រតិបត្តិការបោះឆ្នោត ការរាប់សន្លឹកឆ្នោត និងការប្រកាសលទ្ធផលនៃការបោះឆ្នោត ប្រកបដោយភាពត្រឹមត្រូវ ច្បាស់លាស់ និងមានការទទួលខុសត្រូវ»។

លោកបន្ថែមថា ពីការបោះឆ្នោតមួយទៅការបោះឆ្នោតមួយ គ.ជ.ប តែងតែបានដកពិសោធន៍ពីចំណុចខ្លាំង និងចំណុចខ្សោយនៃការរៀបចំ ការគ្រប់គ្រង និងការប្រព្រឹត្តទៅនៃដំណើរការបោះឆ្នោតមុនៗ មកធ្វើជាមូលដ្ឋានក្នុងការកែលម្អលក្ខណៈបច្ចេកទេសនៃការបោះឆ្នោតជាបន្តបន្ទាប់ឱ្យកាន់តែល្អប្រសើរថែមទៀត តាមរយៈការរៀបចំបទបញ្ជា និងនីតិវិធីសម្រាប់ការបោះឆ្នោត ដែលមានការចូលរួមពិគ្រោះ និងផ្តល់យោបល់ពីគ្រប់ភាគីពាក់ព័ន្ធទាំងអស់។

ជាក់ស្តែង គ.ជ.ប បានរៀបចំបទបញ្ជា និងនីតិវិធីសម្រាប់ការបោះឆ្នោតជ្រើសតាំងសមាជិកព្រឹទ្ធសភា ដោយយកលំនាំតាមបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ដែលការបោះឆ្នោតនេះត្រូវបានវាយតម្លៃជាទូទៅថា មានភាពល្អប្រសើរជាងការបោះឆ្នោតលើកមុនៗ ព្រមទាំងត្រូវបានប្រតិភូសង្កេតការណ៍បោះឆ្នោតអន្តរជាតិកោតសរសើរអំពីដំណើរការបោះឆ្នោត ក៏ដូចជាការងារបច្ចេកទេស។

ជាមួយគ្នានេះដែរ លោកបានស្នើឱ្យគ្រប់គណបក្សនយោបាយ និងភាគីពាក់ព័ន្ធនឹងការបោះឆ្នោតទាំងអស់ ត្រូវគោរពច្បាប់ បទបញ្ជា និងនីតិវិធីនៃការបោះឆ្នោត រួមនឹងក្រមសីលធម៌ ដើម្បីចូលរួមធ្វើឱ្យការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ខាងមុខនេះ ប្រព្រឹត្តទៅទទួលបានលទ្ធផលល្អប្រសើរ និងស្របតាមគោលការណ៍នៃលទ្ធិប្រជាធិបតេយ្យ សេរីពហុបក្ស និងច្បាប់ពាក់ព័ន្ធជាធរមាន៕