សហរដ្ឋអាម៉េរិក ចាប់ផ្តើមផ្តល់អាវុធ និងឧបករណ៍យោធាដែលត្រូវការចាំបាច់ដល់អ៊ីស្រាអែល
សហរដ្ឋអាម៉េរិកបានចាប់ផ្តើមផ្តល់អាវុធ និងឧបករណ៍យោធាដែលត្រូវការចាំបាច់ដល់អ៊ីស្រាអែលរួចហើយ ខណៈដែលមន្ទីរបញ្ចកោណពិនិត្យមើលសារពើភ័ណ្ឌរបស់ខ្លួន ដើម្បីមើលថាតើមានអ្វីផ្សេងទៀតដែលអាចបញ្ជូនបានយ៉ាងរហ័ស ដើម្បីពង្រឹងសម្ពន្ធមិត្តរបស់ខ្លួននៅក្នុងសង្គ្រាមរយៈពេលបីថ្ងៃមកនេះជាមួយក្រុមហាម៉ាស់។
ការផ្តល់នេះ បន្ទាប់ពីលោកប្រធានាធិបតី ចូ បៃដិន នឹងថ្លែងសុន្ទរកថាជាផ្លូវការអំពីការវាយប្រហារនេះពីសេតវិមាននៅរសៀលថ្ងៃអង្គារនេះ ខណៈដែលមានជនជាតិអាម៉េរិកចំនួន ១១ នាក់ត្រូវបានសម្លាប់នៅក្នុងអំពើហិង្សាកាលពីចុងសប្តាហ៍។
លោក ចន ឃឺប៊ី (John Kirby) អ្នកនាំពាក្យក្រុមប្រឹក្សាសន្តិសុខជាតិ បានបញ្ជាក់កាលពីល្ងាចថ្ងៃចន្ទថា ជំនួយយោធាលើកដំបូង បន្ទាប់ពីការវាយប្រហារដ៏ឃោរឃៅដោយក្រុមសកម្មប្រយុទ្ធហាម៉ាស់ កំពុង “បើកផ្លូវ” ទៅកាន់ប្រទេសអ៊ីស្រាអែល។ លោកថា “យើងរំពឹងយ៉ាងពេញលេញថានឹងមានសំណើបន្ថែមសម្រាប់ជំនួយសន្តិសុខសម្រាប់អ៊ីស្រាអែល ខណៈពួកគេបន្តចំណាយលើគ្រាប់រំសេវនៅក្នុងការប្រយុទ្ធនេះ។ យើងនឹងនៅជាមួយពួកគេជាប់រហូត ដោយធ្វើឱ្យប្រាកដថា យើងបំពេញតម្រូវការរបស់ពួកគេឱ្យអស់ពីសមត្ថភាព និងលឿនតាមដែលអាចធ្វើទៅបាន។”
កាលពីថ្ងៃចន្ទផងដែរ មន្ត្រីក្រសួងការពារជាតិជាន់ខ្ពស់មួយរូបបានព្រមានថា សហរដ្ឋអាម៉េរិកកំពុងឃ្លាំមើលយ៉ាងដិតដល់នូវក្រុមហេសប៊ូឡា (Hezbollah) និងក្រុមដែលគាំទ្រដោយអ៊ីរ៉ង់ផ្សេងទៀត ដោយកត់សម្គាល់ថាការសម្រេចចិត្តចល័តនាវាអាម៉េរិកនៅក្នុងតំបន់គឺដើម្បីរារាំងក្រុមណាមួយពីការចូល ឬពង្រីកជម្លោះប្រឆាំងនឹងអ៊ីស្រាអែល៕
