FIFAដាក់ឈ្មោះឱ្យMessiថាជា «GOAT» កីឡាករល្អបំផុតក្នុងប្រវត្តិសាស្ត្របាល់ទាត់
សហព័ន្ធបាល់ទាត់អន្ដរជាតិ FIFA បានហៅខ្សែប្រយុទ្ធ Lionel Messi ថាជាកីឡាករល្អបំផុតក្នុងប្រវត្តិសាស្ត្របាល់ទាត់មនុស្សជាតិទៅហើយ ក្រោយពីគេបានជួយអាហ្សង់ទីនឈ្នះពាន World Cup 2022 នៅយប់មិញនេះ។
ក្រោយពីការប្រកួត World Cup បានបញ្ចប់ទៅ ដោយអាហ្សង់ទីនរបស់ Messi ជាអ្នកលើកពាននោះ សហព័ន្ធបាល់ទាត់អន្ដរជាតិបានអះអាងថា៖ “ការពិភាក្សា GOAT ជានរណាបានបញ្ចប់ហើយ។ ពានរង្វាន់ធំបំផុតលើលោក បច្ចុប្បន្ននេះបានធ្លាក់ទៅដៃកីឡាករល្អបំផុតលើលោកហើយ។ នៅថ្ងៃអាហ្សង់ទីនឈ្នះ World Cup ជាលើកទី៣ Messi គឺជាកីឡាករល្អបំផុត។ Messi គឺជា GOAT”។
សម្រាប់ការប្រកួតពាន World Cup 2022 នេះ Messi ជាអ្នកឈ្នះពានកីឡាករល្អបំផុតប្រចាំព្រឹត្តិការណ៍ និងបណ្ដេញយកពានស្បែកជើងមាសជាមួយ Kylian Mbappe ផង ដោយចាញ់ត្រឹម១គ្រាប់ប៉ុណ្ណោះ។ ក្នុងអាជីពរបស់គេត្រឹមវ័យ៣៥ឆ្នាំនេះ Messi លេងបាន១០០៣ប្រកួត និងរកបានគ្រាប់បាល់សរុប៧៩៣គ្រាប់ហើយ៕